Polo que se ve, o Goberno Municipal de Gondomar iniciou o novo ano sen a menor intención de “propósito de enmenda” e facendo caso omiso das recomendacións de austeridade que os xefes políticos do PP pregoan día si e día tamén dende as diferentes estancias do goberno, medios de comunicación, partido, etc., etc.

Pois ben, podería parecer que en Gondomar van por libre, mais non é así. O novo Goberno Municipal de Gondomar a estas alturas xa é un paradigma de ineficacia, desleixo e nula capacidade de xestión, co agravante de que por facer un traballo (político) ao que ninguén está obrigado a se presentar, non dan feito malia ter unha mayoría absoluta de nove membros dos cales seis teñen unas razoables adicacións exclusivas. Ás perdas de importantes subvencións acontecidas o ano pasado: A Pasaxe, policía local, obras de saneamento, etc., agora hai que sumarlle novo episodio. E o ano non fixo máis que comezar, por non falar do novo PXOM que nin sabe del nin se lle espera. Francamente este goberno vai camiño de superar o difícil record do goberno anterior dos Srs. Urgal-De Lis, que xa é difícil!!!

De entrada, non foron quen de aprobar os orzamentos municipais en tempo en forma, tendo Gondomar dende o día un de xaneiro os orzamentos prorrogados do anterior goberno municipal, que en si mesmos son un despropósito e que só tiñan por obxecto o cobro das adicacións exclusivas dos Srs. Urgal, De Lis, Cabaleiro, etc.
Pero a cousa segue en caída libre cun Alcalde ausente e sen propostas e un goberno dividido e incapaz nuns tempos nos que dende os concellos hai tanto que facer. Para abrir boca velaí tres exemplos que acaban de acontecer e co goberno muncipal a velas vir:

1º EXEMPLO.- Malia os orzamentos escuálidos do Concello e as necesidades urxentes que hai que atender (lembrar que non hai moito Correos lle suprimira o servizo ao Xulgado de Paz por falta de pago ou, os recortes nas bolsas dos comedores escolares, etc, etc) , por orde da propia Alcaldía mercaron sobre de 100 axendas do 2012 por un importe de 2.000€. O devandito gasto foi realizado co reparo da Intervención Municipal por non haber dispoñibilidade orzamentaria para facelo. Iso iso, a imprenta afortunada é propiedade dun destacado militante e dirixento do PP local e estreito colaborador do Sr. Guitián. O BNG devolverá estas axendas por consideralas un gasto innecesario nestes tempos de crise e recortes.

2º EXEMPLO.- O BNG acaba de saber que debido ao cambio da centraliña telefónica do Centro de Saúde de Gondomar por parte do SERGAS por outra nova, este organismo dirixiuse ao Concello hai máis de dous meses solicitándolle a cesión da liñas co obxecto de facerse cargo o SERGAS do pago da factura de telefóno que ate agora viña correndo por conta do Concello, pois ben, o SERGAS acaba reiterarlle a petición ao Concello e seguen sen facer caso. Ao final, seguirá pagando o Concello no canto de aforrar unha media anual de aproximandamente 4.000€. Suma e segue, así é como mira polos nosos impostos este goberno municipal.

3º EXEMPLO.- O último caso de xestión brillante e eficaz é do pasado sábado. Pola mañá cedo sobre as 8hs., e para sorpresa de propios e extraños, os vendedores da Praza Abastos Municipal atoparon a primeira hora a praza pechada, e o que é peor sen que ninguén respondera as súas chamadas ata que consegueron contatar coa Policía Local, e a través desta as chaves da praza, e unha vez dentro non tiñan auga para poder traballar, etc, etc. O caso é que ás 10,30hs cando a cousa se “normalizou” o negocio xa estaba perdido e a maioría dos clientes que alí se chegaron xa foran de volta. Lembrámoslle ao Sr. Alcalde que el é o Xefe de Persoal e que ademais hai un concelleiro encargado desa area, por certo, con adicación exclusiva para evitar estas cousas.

O triste de todo isto, é que Gondomar conta cun Goberno que nin cre, nin lle importa o Concello e as persoas que aquí vivimos, eles están a outra cousa… Dende o BNG cumpriremos coa nosa obriga de denunciar estes feitos, esixir que non se volvan a repetir e en consecuencia, pedirémoslle explicacións ao Alcalde no vindeiro pleno deste mes.

Primeiro foron as árbores do Parque da Coelleira e da Pza. da Paradela e doutras rúas do centro da Vila de Gondomar. O de menos era o valor da especie a “podar”. A motoserra municipal tratounos por igual (sen piedade) a todos: aos plátanos de xardín que aos arces; aos bidueiros que os loureiros, etc, etc……..Unha poda homoxénea e sen distición de clases arboreas. Poda premonitoria dos recortes que han vir.

Pois ben, o interese das árbores ornamentais nun parque valórase por diversos motivos, entre eles están a saúde e tamén o porte e a naturalización das mesmas. Esas árbores aparentemente estaban sans e o seu porte era bastante alto e naturalizado pois probablemente nunca foran podadas. O feito de seren altas non xustifica a tala indiscriminada e agresiva que está a realizar o Concello no Parque da Feira (as árbores foron plantadas hai case cen anos precisamente para darlle sombra á feira de gando que alí se celebraba), agora cortándoas pola metade, ademais da fealdade que vai constituír a visións dun bosque mutilado, sen dúbida vai debilitar as árbores permitiendo a entrada de couza e fungos polas partes cortadas por moi tratadas que poidan estar (que non é o caso), secando moitas delas. Non van dar sombra ata bastante tempo, característica dese parque e deixarán sen hábitat aos seres vivos que habitualmente o ocupan, os paxaros marcharán para outro sitio. Asemade, dicir que ao BNG non lle consta a existencia dun mínimo estudo técnico, rigoroso e feito por expertos que aconselle semellante arboricidio. Para nós que foi outra brillante idea deste goberno municipal deslavazado e sen ideas, que un día subvecniona unha chourizada e outro saca a motoserra no canto de facer propostas serias e programadas e por riba gastando cartos e recursos públicos.

O BNG no vindeiro Pleno do mes de xaneiro pediralle explicacións ao Alcalde por este asunto e a que respondeu semellante arruotada. Facemolo responsable do afeamento da Vila e do deterioro dun espazo urbano humanizado dende hai case cen anos. Esta nova moda de podar as árbores da Vila de Gondomar de maneira salvaxe e irracional, é unha mostra máis da falla de sensibilidade medio ambiental do novo goberno municipal, actuando ao contrario do que se fai nos países civilizados. En calquera país de Europa esta actuación sería motivo de responsabilidades penais.

Como podedes ver nas fotografías o estado desta ponte é, ademais dun espectáculo lamentable á vista dos que por alí pasan, perigoso. Pois ben, esta ponte está a pouco máis de cen metros da casa do Concello e é un lugar de paso importante (durante centos de anos e ata o Século XX foi o único punto de unión entre Gondomar e a outra banda do río, e con Tui, sendo asemade parte fundamental do Camiño real). Hoxe o abandono resulta evidente, por non falar do muro de pedra anterior á ponte que delimita o camiño que está case na súa totalidade derrubado. Trátase dun importante elemento patrimonial: unha ponte Medieval, en uso e practicamente no centro da Vila. Menuda carta de presentación para propios e visitantes!!! O Concello ten que actuar xa, impedindo o deterioro da ponte e da súa contorna, e poñendo en valor todo o seu conxunto. Dende o BNG reclamamos actuacións urxentes ao respecto, e aqueles que nos gobernan e cobran unhas razoables adicacións exclusivas por atender estas cousas, que actuen sen dilacción.

Onde antes había colectores do lixo, agora simplemente hai lixo. A situación repítese na parroquia de Donas ante a pasividade do Goberno Municipal e, a pesares de que o BNG informou desta situación no pleno celebrado en Novembro, a día de onte todo seguía igual.

Ana Luisa Bouza advirte que rachar co sistema actual acabará coa equidade social, pois o acceso ás próteses dependerá da situación económica de cada quen

Santiago de Compostela, 9 Decembro 2011.- O Partido Popular expresou hoxe a súa negativa a manter o actual sistema de dispensación de material ortoprotésico, tal e como propuña o BNG a través dunha proposición non de lei, abrindo así a porta a que os doentes teñan que adiantar o pago das súas próteses e logo reclamarllas ao Sergas.

A deputada do BNG Ana Luisa Bouza, na defensa da iniciativa, lamentou o voto en contra do grupo popular e advertiu que era unha proposta sinxela, sen maior compromiso que o de “deixar as cousas como están” fronte a un modelo novo, o que se pretende impoñer, que vai ter un efecto disuasorio entre os pacientes e vai impedir o acceso igualitario, independentemente dos recursos, a esta prestación.

Para a parlamentar, ante a emenda presentada polos populares, se realmente quixeran demostrar a veracidade do seu compromiso coa xustiza social terían aceptado a proposta de transación, de tal xeito que á proposta nacionalista se sumara o compromiso de eliminar o copago ás persoas sen recursos e clasificadas como código 29, “mais o sentido do voto deixou ben ás claras –dixo- ou seu escaso espíritu social e por tanto a súa inhumanidade”.

Ana Luisa Bouza asegurou que traía esta proposición non de lei á Cámara porque na actualidade, pendentes de coñecer a continuidade en 2012 do convenio asinado xa en 2006 para dar cobertura a este sistema, existe unha preocupación entre as persoas afectadas como doentes e dos establecementos dispensadores pola falta de información.

“Poder acceder a unha prótese sen diferenzas pola situación económica –engadiu- é unha garantía de xustiza social imprescindíbel en momentos de crise como os que estamos a vivir, máximo cando o acceso á prótese pode supoñer unha diferenza de ter unha vida autonóma a non tela”.

Neste sentido, Bouza lembrou que o sistema adoptado en Galiza favorece precisamente esa equidade, de aí a importancia de manter as cousas como están e non abrir vías novas que van volver castigar aos que menos teñen.

COMPARECENCIA SANIDADE

Por outra parte, durante o transcurso da mesma Comisión, Ana Luisa Bouza aproveitou unha pregunta oral sobre as listas de espera do último trimestres para emprazar á conselleira a que dea contas na Cámara das declaracións feitas por Núñez Feijóo na “TDT Party” (en alusión a Intereconomía) anunciando novos recortes na Sanidade e “grandes ideas” para resolver as listas como cobrar por ingresar.

A deputada nacionalista ironizou coa resposta da directora xeral de Atención Sanitaria, que asegurou que os dados demostran que se vai polo bo camiño e que se están cumprindo os obxectivos, e prantexou se acaso ese obxectivo e ese bo camiño é que haxa máis de 37.000 persoas agardando por unha operación, dúas mil máis que en Setembro do ano anterior?.

A parlamentar cuestionou tamén que a directora fale de resultados “moderadamente satisfactorios” cando os tempos de espera tamén se incrementaron e tanto as cifras de persoas agardando como as de espera, 93,4 días de media, son as peores dende 2005.

Cualificou igualmente de gravísimos os dados de Povisa, onde hai 224 persoas que agardan por unha intervención dende hai un ano e advertiu que o BNG seguirá trimestre a trimestre denunciando esta realidade, “porque así nolo demandan os cidadáns. Vostedes son os que alarman e nós, a nosa obriga é denunciar”.